هعمل زي ويجز وهستخدم موسيقى متباعة وتامر عاشور مثال لاستباحة ألحان ناس عايشة.. أبرز تصريحات عمرو مصطفى

حل الفنان عمرو مصطفى ضيفًا على أحد البرامج التلفزيونية، وتحدث خلال اللقاء عن تفاصيل خلافه مع المنتج محسن جابر، ومشواره الفني، وبعض التفاصيل عن حياته الشخصية.

أبرز تصريحات عمرو مصطفى
وجاءت أبرز تصريحات عمرو مصطفى كالتالي:

- مليش علاقة بالغرور ولا النرجسية وأنا بس بدافع عن نفسي عشان محدش يأذيني.

- كتير من المقربين مني شايفين إني لازم أروح لدكتور نفساني، لكن لما روحت لدكتورة قعدت تحكيلي مشاكلها وبقيت أنا الدكتور.

- أنا بحب الموسيقى فقط لا غير، وبديها وقتي وأتخانق عشانها، ممكن تكون دي مشكلتي.

- أنا مش بشاكس حد أنا عايز أشتغل، لكن مش حاجة ملفتة إني لما عملت الذكاء الاصطناعي فجأة لقيت الناس كلها بتهاجمني، لمجرد إن عندي فكرة جديدة؟

- لما عمرو مصطفى رجع يشتغل وعمل أغاني كلها تريند في ناس ابتدت تخاف.

- أعاني من اضطراب فرط الحركة وابني طالع كده، وعندي مشاكل معاه وبنروح لدكاترة كتير.

- أهلي أشفقوا على حالتي وأنا مشفق على ابني، لكن المصابين باضطراب فرط الحركة دايما موهوبين في حاجة.

- في أغنية أنا عملتها لمصطفى صندل التركي، تامر عاشور أخذ اللحن والتوزيع الموسيقي، ونزل الأغنية وكتب عليها اسم ملحن تاني.

- تامر عاشور مثل من أمثلة استباحة الجمل اللحنية لأشخاص على قيد الحياة، والمفروض كنت تشيل الأغنية من يوتيوب لما عرفت إنها لحني وتستأذن مني، لكن ملقتش أي احترام واستباحها.

- قولت إن ويجز ومغنيين الراب بيستخدموا الموسيقى المتباعة، وهما فهموا غلط وأنا كنت بشكر فيهم مش العكس، وده ستايل الموسيقى في العالم كله، برافو عليهم وهما مميزين.

- أنا هعمل كده زي ويجز ومغنيين الراب الفترة اللي جاية، وكل يوم الساعة 8 هعمل الأغنية بالأبليكشن ده، وهما بيتعبوا إنه هو يختار الموسيقى ده ذوق، ولو خدت الموسيقى زي ما هي مش عيب.

- أنا عايز أرسي مبدأ، مفيش تنازل في تصريح، وأي أغنية أعطي ورقة بها ستكون تصريح بسنة أو سنتين أو 3 سنوات أو 5 سنوات، لكن 49 سنة ده إجحاف.

- أنا لم أتنازل عن حقوقي في الديجيتال والمفروض محسن جابر يعيد التعاقد، وفي حاجة في القانون بتقول لو الفنان تنازل عن الأغنية بتنازل بات لا رجعة فيه، وظهرت تقنية جديدة تسمح له إنه يكسب فلوس من حقه يبطل التنازل ويعيد التعاقد مرة أخرى.

- محسن جابر بيقول إن عنده 30 ألف مصنف أغنية، لو الأغنية بتدخل دولار في اليوم، يعني حضرتك بتدخل 30 ألف دولار كل يوم الصبح، يعني 900 ألف دولار في الشهر، يعني 12 مليون دولار في السنة، رغم إن في أغاني بتدخل 20 ألف دولار في الأسبوع، فين حقوق المبدعين؟، هو أخذها كلها.