مروة صبري تكشف حقيقة هجومها على ميرهان حسين: إحنا مش أطفال وأنا قلت كلمة حق

أوضحت الإعلامية مروة صبري مقدمة برنامج " قعدة ستات" الذي يعرض على شاشة "اليوم" حقيقة هجومها على الفنانة ميرهان حسين بعد تراجعها عن قرار اعتزالها للفن.

حقيقة هجوم مروة صبري على ميرهان حسين

وقالت مروة صبري في تصريح خاص لـ"فيتو":" في البداية كلمة تريند بتضحكني اللي هو أني أعمل شئ علشان أطلع تريند.. أنا الحمد لله البرنامج عندي كل أسبوع تريند، واليوم اللي اعتزلت فيه ميرهان أنا عملت أنترو للدفاع عنها وناس كتير هاجمتني".

تفاصيل الهجوم على مروة صبري بسبب ميرهان حسين

وكشفت مروة عن الهجوم التي تعرضت له بعد دفاعها عن ميرهان حسين وقالت:" قالوا أنتي بدافعي عنها ليه دي طالعة تاخد تريند وأنا قولتلهم لأ يا جماعة محدش يحكم علي حد لأن كل شخص في النهاية نفسيته بتتعب وبتضعف وممكن تكون هي تعبانه فنقف معاها وهي نجمة جميلة وقلت إنها بتحاول تتعافى وتاخد وقتها ".

أسباب اعتذار مروة صبري للجمهور

وعن سبب اعتذارها للجمهور قالت:" أنا رجعت اعتذرت للجمهور لأني اتهاجمت بشكل كبير للغاية بعد دفاعي عن ميرهان في الوقت التي كتبت فيه منشور إعتزالها ولكن الشئ اللي أحزنني هو فكرة الاستخاف بالجمهور"، وأضافت:" اللي هو بعد ما اعتزل الفن أرجع بعد 10 أيام أو أسبوع أقول أنا كنت بقول بعتزل السوشيال ميديا".

واستطردت:" أنا بتكلم على حق الجمهور فين حق الجمهور علشان الجمهور له حق على الفنانين وخصوصا الموهوبين والناجحين مثل ميرهان حسين أنا ماينفعش النهاردة اتلاعب بالكلام، ماينفعش تقول أنا معتزلة الفن وتظهر بعدها بـ 10 أيام وتقول علي الهواء أنا مقولتش أني اعتزلت الفن أنا قلت أني بعتزل السوشيال ميديا هو فيه حاجة اسمها كدا ! هو إحنا أطفال بيضحك علينا لازم يكون فيه أحترام للجمهور ولازم يكون في احترام للفن ولازم يكون الفنان قدوة زي ما بيتقدر وبيكون له نسب مشاهدة مرتفعة لازم نحترم بعض دا الشئ اللي خلاني أطلع اعتذر للناس".

وكانت علقت المذيعة مروة صبري علي تراجع ميرهان حسين عن اعتزالها الفن قائلة:" أنا أسفة لنفسي لأني صدقت لأني أنا أضحك عليا وأنا معرفهاش بشكل شخصي أنا بحبها كفنانة وصعب عليا أني حد يكون محطوط تحت ضغط نفسي لأي سبب من أسباب".

وكانت الفنانة ميرهان حسين تراجعت عن قرار اعتزالها الفن، حيث كانت قد كشفت في وقت سابق عن اعتزالها بسبب ما وصفته بـ"الشلالية" داخل الوسط الفني.

ميرهان حسين

ونشرت ميرهان حسين مقطع فيديو عبر خاصية الأستوري من خلال حسابها على موقع الصور الشهير "انستجرام"، قائلة: "أولا وحشتوني جدًا، وآسفة أني اختفيت عنكم الفترة دي، واختفيت عشان أرجع أحسن من الأول، بجد مش عارفة أشكركم ازاي على حبكم واهتمامكم اللي شوفته الفترة اللي فاتت شكرا لكل أصحابي وأهلي زمايلي والناس اللي بتحبني، وفعلا لولاهم مكنتش هعرف أعدي الأيام اللي فاتت دي".

تراجع ميرهان حسين عن اعتزال الفن

وأضافت: "بخصوص موضوع اعتزالي، أنا مكنتش أقصد إني بعتزل الفن أنا كنت أقصد إني بعتزل السوشيال ميديا، أعتزل الناس لفترة؛ عشان كان عندي إحباط وعديت بفترة فيها إحباط زي أي بني آدم ممكن يعدي بفترات حياته بيتعب ويكتئب، وبوقفة الناس اللي بيحبوه جنبه بيقدر يعدي الوقت الصعب ده".

وأردفت: "كنت مش في أحسن حالاتي وبوقفكم جمبي ودعمكم ليا رجعت أحسن وإن شاء الله الأيام اللي جاية يارب تكون الأحلى وأحسن في حياتي وفعلا بوقفتكم جنبي وحبكم ليا إن شاء الله قادرة أعدي، وأوعدكم الفترة الجاية بحاجات حلوة وميرهان اللي بتحبوها، بجد شكرا".