لقيت ولكن !! انسان من واقع الحياه

أنا لعنة حياتي كلها تتلخص في اني مجهول النسب أو لقيط بالعامية. عندي دلوقتي 38 سنه مستقر مادياً على قدي وبشتغل في شركة كبيرة ولله الحمد لكن عديت بظروف صعبة لحد ما اوصل للي وصلت له انهارده. فتحت عيني لقيت نفسي في دار رعاية وعرفت اني قبلها كنت عايش في جمعية خيرية اول سنتين من حياتي وبعدين حولوني لدار رعاية تابعة لوزارة التضامن الاجتماعي وفضلت اتنقل من دار لدار لحد ما بقى عندي 17 سنه وقدرت أشوف حياتي بنفسي وكنت من سن 15 سنه بشتغل صبي بواب في مباني تابعه لشركة كبيرة معروفة ولما بقيت 17 سنه وفرولي اوضه انام فيها فسبت دار الرعاية و كملت دراستي وكانوا زملائي البوابين يغطوا عليا في فترة الامتحانات عشان اعرف اذاكر وفضلت كده لحد سنه تالته كلية تجاره وبعدها لقيت وظيفة تانية ثابته وقدرت اسكن اخيرا في اوضه لوحدي.

انا معرفش اسم ليا غير الاسم اللي سماني بيه الدكتور اللي سلمني لجمعيه خيرية للايتام وانا صغير.. واسمي التاني الملحق بالاسم الاول اطلقه عليا المشرف بتاع الجمعية
اتنقلت بين وظايف كتيره، وكنت احيانا في الصيف باشتغل في اكتر من شغلانه. كنت عارف ان ماليش ضهر ولا سند ولا اهل هيساعدوني لو وقعت في مغامره غير محسوبه وعشان كده قبلت بوظايف اقل بكتيييييير من شهادتي وساعات كنت بقبل اشتغل 24 ساعه عشان ملاليم بحوشها.

حياتي كانت مليانه خيبات كتيره. من ناحية الحب انا كنت عارف ان مش من حقي احب اساسا لأن اللي عايش ظروفي مش من حقه يحب او يبص على البنات عشان كده عمري ما حبيت لكن بعدما استقريت في الشغل وكوّنت نفسي حاولت ادور على نصيبي وتقريبا اترفضت 12 مره من 12 اسره مختلفه وكنت باختار أسر مستواها اقل ماديا على امل انهم هيشوفوا مميزاتي (وسيم - مستوى وظيفي كويس - عندي عربية وقادر افتح بيت ومحوش فلوس) وانهم ممكن قدام المميزات دى يتغاضوا عن حقيقة اني مجهول النسب لكن للاسف محدش فيهم قدر يعمل كدا.
حاولت أدور بين مجهولات النسب زيي ولقيت واحده كان فيها كل حاجه ممكن واحد زيي يحلم بيها جميله وخلوقه ومتعلمه وجامعية وكنت هأطير من الفرح وارتبطنا وحددنا معاد الفرح وقبل الفرح باسابيع قالتلي انها كانت تعرف واحد من فترة طويلة من ايام الكلية وكانوا عايزين يتجوزوا بس كانت عنده مشاكل مع اهله بسبب وضعها الاجتماعي وراح اتجوز بنت تانيه وحصلت مشاكل وط٠٠لق ودلوقتي بعد دا كله اهله اقتنعوا وقبلوا بيها وهي عايزه تتجوزه. والله مش هأكدب عليكم انا عيطت بين ايديها زي العيل الصغير لأني كنت خلاص فاكر اني لقيت اللي كنت بأدور عليها ومكنتش متوقع خيبة الامل التقيله دى من ناحيتها وهي كمان عيطت وقالتلي اني حد كويس ويمكن من احسن الناس اللي قابلتهم في حياتها واحسن حتى من اللي هتتجوزه لكن كفايه انها هي لقيطه ونفسها ترتبط بواحد مش لقيط وعنده اهل عشان اولادها يبقى ليهم أهل وسند وضهر.. انا عارف ان كل كلمه قالتها كانت صح ومعاها حق بس انا اتوجعت اوي.
بعدها قررت أنسى موضوع الجواز خالص واقنعت نفسي ان ده قدري اللي ربنا كتبهولي اني اعيش لوحدي وهاتقبله وربنا يعوضني في الاخرة ان شاء الله وكنت هأكمل كده لولا ان في واحده دخلت حياتي بطريقه مكنتش متوقعها.
البنت دي كانت صديقة موظفة تشتغل معايا في نفس القسم تحت اشرافي .. يعني انا مدير صاحبتها. وكنت باشوفها كتير مع صاحبتها وعادة ما كنت بالاقيها تستنى صاحبتها في عربيتها تحت المبنى لأنها هي اللي توصلها كل يوم وكانت على طول بتبسم وتسلم عليا. بعد كده لقيتها بتبعتلي اضافة عالفيسبوك وابتدينا نتكلم ف الشات وأنا كنت حذر اوي في كلامي معاها عن نفسي وحياتي بس هي كانت عفوية اوي وكانت تكلمني عن حياتها وعن اهلها وعن تفاصيل يومها بطريقة جذبتني ليها. كانت عكسي في كل حاجه .. انا انطوائي وهادئ وباتعامل بالعقل والمنطق في كل حاجه وهي جريئة ورغاية وعفوية وعاطفية اوي وطبعا حصل المحظور وحبيتها بس عمري ما اعترفتلها بكده لان مش من حقي احبها اصلا. كانت بتسألني دايما انت ليه متجوزتش لحد دلوقتي؟ وكنت دايما باتهرب من الاجابة لحد ما ضعفت في يوم واعترفتلها اني لو لقيت واحدة تقبل بيا كنت اتجوزت من زمان وقلتلها كل حاجه عن حالتي الاجتماعية وظروف حياتي ولقيتها سكتت وبطلت ترد على رسايلي. عشت 3 ايام في قلق وخوف وكنت بلوم نفسي لان محدش من الشغل كان يعرف اني مجهول النسب وبغبائي انا قلت للبنت دى اللي اكيد هتقول لصاحبتها اللي هتقول لكل الناس في الشغل لدرجة اني ابتديت افكر في اني استقيل وادور على شغل تاني لكن بعد اسبوع تقريبا لقيتها بعتتلي رسالة طويلة قالت انها اتأثرت بكل كلمة حكيتها وهي بعدت لانها كانت محتاجه وقت تفكر وهي قررت تتجوزني لانها بتحبني ومش هتلاقي احسن مني وانها استخارت وارتاحت ليا وكتبتلي رقم ابوها عشان اكلمه واتقدم ليها. اتقدمتلها وخدت معايا واحد صاحبي وأبوه وهما كانوا معايا في كل المرات اللي اترفضت فيها قبل كده وعاشوا معايا كل الخيبات.
المهم اكتشفنا ان ابوها راجل محترم ومعروف في مجاله وبيكتب مقالات هادفة وبيعمل برامج توعوية للشباب تحث على الدين والاخلاق وكتير ناس بيعتبروه قدوة وفعلا استقبلنا بكل احترام وسمعنا للاخر وبعدها قالنا نتشاور ونأخذ رأي البنت ونرد عليكم ان شاء الله. طبعا بعد الزيارة كلمتني وقالت ابوها مش موافق بس هي متمسكه بيا وبتحاول تقنعه. بعد اسبوع اتصل بيا أبوها وقال انو عايز يقابلني ويقعد معايا شوية واتقابلنا وقالي بص يا ابني أنا هأتكلم معاك بكل صراحه وقالي مافيش أب في الدنيا يتمنى لبنته زوج مجهول النسب وكالعاده شكر فيا واني شاب محترم وكويس ومواصفاته كويسه لكن بالاخير لازم يشوف مصلحة بنته. انا طول القعده فضلت ساكت باسمع منه بس. حكالي عن تصرفات بنته اللامسؤولة –على حد وصفه- قال انها يتيمة الأم وانه مقصرش في تربيتها بعد وفاة أمها وأنه ميفرقش في المعاملة بينها وبين اخواتها اللي من مراته التانية بالعكس يحبها هي اكتر منهم لكن ملقاش منها غير العقوق والجحو لانها دايما تحطه في مواقف بايخه زي موقفه معايا. قال انه اتفاجأ قبل كام سنه وهي في الثانوية انها تكلم شباب عالنت لدرجه انها في فتره كانت تتكلم مع ولد مسيحي ولما منعها دخلت في حالة اكتئاب قوية وانها لحد دلوقتي بترفض أي حد يتقدم لها ودلوقتي جابتله واحد لقيط عشان تحرجه مش اكتر. طبعا هوا بيتكلم ويشكي وانا حاسس بكل كلمه يقولها ط٠٠عنه في قلبي. المهم كان عايزني انا ابعد عنها واسحب خطبتي عشان ارفع عنه حرج انه يرفضني.. وفهمت انه خايف كمان على مكانته بين الناس اللي بيعتبروه قدوة لو رفض واحد مجهول النسب اتقدم لبنته. وادي خيبة امل مش عارف رقم كام.
الخلاصة وباعتذر للاطاله .. احمدوا ربكم على أهلكم .. واللي بيشكي ويقول ابوه قاسي انا اتمنى أب قاسي عالاقل يديني اسمه بس ومش عايز منه اي حاجه تانيه. وكمان عايز اقولكم أن مجتمعنا فيه خير على فكرة وبيعطف خاصة على البنات وكتير مجهولات نسب بيتزوجوا ويعيشوا أحلى حياة لكن المجتمع شوية قاسي علينا احنا الذكور مجهولي النسب.. في شباب كتير اعرفهم مجهولين النسب اتجوزوا بنات بنفس ظروفهم وعايشين بسعاده لكن معرفش اي مجهول نسب اتجوز بنت عادية لكن جايز تبقى في حكاية زي كده وانا مسمعتهاش لان المجتمع لسه فيه خير ان شاء الله.
كمان عايز أقولكم ان مجهولي النسب كتير منهم بيتحولوا اولاد شوارع وحتى اللي بيكبروا في دور رعايه مش كلهم بيكملوا تعليمهم ويحاولوا يبقوا نافعين للمجتمع ويا ريت كلنا كأفراد وكمؤسسات دولة نهتم بيهم. أنا عن نفسي من يوم ما اشتغلت وجزء من مرتبي يروح تبرع لدور الرعاية وناوي ان شاء الله أربي ولاد لقطاء لوحدي وأشرف على تعليمهم وتربيتهم واصرف عليهم منها يؤنسوا وحدتي ويشغلوا حياتي ومنها كمان يلاقوا حد يعطف عليهم ويربيهم
ادعولي