سلوى خطاب عن بداياتها الفنية: جدتي قالتلي بقا تسيبي كلية التجارة وتروحي معهد الرقاصات؟

تحدثت الفنانة سلوي خطاب، عن بدايتها في الوسط الفني، مؤكدة أن أسرتها رفضت دخولها الوسط بشكل تام، ولكنها استطاعت إقناعهم فيما بعد، بعد ما التزمت بالشروط التي وضعوها لها.

وقالت سلوى خطاب، في تصريحات تلفزيونية: جدتي طلبت مني إني أدخل كلية التجارة، وأنا مكنتش عايزة أدخلها خاصة إني كنت أدبي في ثانوي، وهي كانت عايزاني أبقى مديرة في بنك، ودخلت كلية التجارة ونجحت.

وتابعت سلوى خطاب: وأنا قاعدة بقرأ في الجرنال لقيت إعلان طالبين دفعة لـ معهد الفنون المسرحية، قُلت طب ما أنا أروح أقدم أنا بحب الفن، وروحت وطلبوا مني أعمل مشاهد وعملتها ونجحت وكل ده من ورا عيلتي.

وأضافت سلوى خطاب، إنها تعرضت للضرب من قِبل أعمامها بسبب دخولها الوسط الفني، قائلة: سحبت ورقي من كلية التجارة وقدمتها في معهد الفنون المسرحية، وبعدين في يوم كتبوا عني في الصحافة إني في أول طريق النجاح وأهلي شافوا الحاجات دي وجالهم حالة ذهول وقالوا إزاي عملتي كده؟ قُلت لهم بحب الفن، وكانت أول مرة أتضرب في حياتي من أعمامي.

واستكملت: جدتي كانت منهارة وقالتلي كده تكسفيني؟ حد يسيب كلية التجارة ويروح معهد الرقاصين؟ هي بالنسبة لها مش فاهمة إن فيه معهد فني، قُلت لها مش إنتي بتحبي أمينة رزق؟ أنا هبقى زيها هي دارسة مسرح، وكانوا حاطين ليا شروط زي أن مفيش مشاهد خارجة، وممنوع التأخير.