ضحية نصب شقيقة لاعبي كرة قدم شهيرين: بقالها 8 سنوات بتماطلني واستغلت اسم أخوها في الاحتيال

روت ديانا بهاء ضحية نصب شقيقة لاعبي كرة قدم شهيرين تفاصيل القصة الكاملة والحكم القضائي الصادر ضد شقيقة اللاعبين، مؤكدة أن الواقعة بدأت منذ 8 سنوات وأنها حصلت على أحكام قضائية ضد المتهمة لقيامها بالنصب عليها في مبالغ تخطت المليون جنيه.

وقالت الضحية في تصريحات: خديجة جمعة شقيقة اللاعب كانت بتاخد من المحل بتاعي حاجات بـ 20 وثلاثين ألف جنيه، وابتدت العلاقة بينا من 8 سنوات عن طريق المحل وبقينا أصحاب، وكانت بتاخد حاجات من المحل عندي وبتسدد تمنها في الأول.

وأضافت ديانا: بعدها قالتلي إن أخوها اللاعب الشهير بيستورد قطع غيار نقل تقيل من السعودية وبيتاجر فيهم، وكان وقتها مش معايا فلوس لأني عندي محلات كبيرة، فاخدت من خالتي هي صاحبة دار أيتام مبلغ 200 ألف جنيه عشان تشغلهم لي.

ضحية نصب شقيقة لاعبي كرة قدم شهيرين

وأكملت ديانا: قامت خديجة بكتابة إيصالين أمانة بالمبلغ ووعدتني بدفع أرباح 10 آلاف جنيه مكسب، وبالفعل ادتني أول وثاني شهر وفي الشهر الثالث جات قالت لي إن في 3 حاويات كبار داخلين ومحتاجين سيوله أكبر فخليت أمي سحبت قرض على المعاش بتاعها، وكنت ساحبة قرض كبير وجوز بنت خالتي كان جاي من السعودية وخدنا فلوسه واديناها المبلغ مليون و150 ألف جنيه.

وواصلت ديانا حديثها: كلمتني خديجة وقالت لي إن سائق الشاحنة اتمسك في كمين على البحر الأحمر، ووعدتني بدفع الفلوس، وبعد فترة بعتلها تاني عشان تدفع ولكنها توعد ومتوفيش، وقعدنا مع والدها وطلب يقطع الايصالات ويقوم بالتوقيع بدلا من بنته، لكني رفضت ذلك ووعدنا والدها بدفع مبلغ 200 ألف جنيه الأول وبعد كل شهر 100 ألف ولكن لم يفي أيضا بوعوده.

وقالت ديانا: تواصلنا مع عم شقيقة اللاعب الشهير ويعمل محامي وقال طالما معاكم ايصالات قدموها لجهات التحقيق وخدوا حقكم بالقانون، وبعدها في قاضي عرفي طلب الجلوس معنا ووعدنا بإرجاع حقنا بس من غير فوائد، وأتاكد من صحة المبلغ اللي لينا والقاضي العرفي وعدني لو هما مدفعوش إنه هيبيع مزرعته ويدينا الفلوس، وأتنازلنا عن القضايا وبرضه ما أخدناش أي فلوس.

وأنهت ديانا حديثها: سجلنا القعدة ورفضوا يدولنا إيصالات وقالوا لنا هتاخدوا المبلغ على أربع دفعات، وقالوا لنا تتنازلوا عن القضايا عشان شقيقها لاعب كرة قدم شهير ورفع عليا قضية سب وتشهير.. أنا لما ملقتش فايدة رفعت قضية عليهم بإيصال أمانة من اللي معايا، وحكمت المحكمة بـحبسها 3 سنوات، وطعنوا بالتزوير ولكن المحكمة أيدت الحكم وأنا كل اللي طالباه أخد فلوسي ويتنفذ الحكم.