كريم الحسيني: متأكد إني هقابل تامر حسني.. وعايز أتعاون معاه لأن أفكاري لايقة عليه

كشف الفنان كريم الحسيني، عن كواليس منشوره الخاص بطلبه مقابلة الفنان تامر حسني، الذي أثار جدلًا خلال الساعات القليلة الماضية، حيث نشره مرة أخرى بعد عام من كتابته، قائلًا إنه لم يقابل حسني، حتى الآن، ومؤكدًا أنه ليس غاضبًا منه ويقدر مدى انشغاله، متمنيًا التعاون معه.

وقال كريم الحسيني، في تصريح خاص: مفيش أي حاجة حصلت من السنة لغاية دلوقتي، رغم إني عارف أنه شخص محترم جدًا وعمره ما بيتأخر، بس أكيد اللي شغالين تحتيه هما اللي مش فاضيين ومبيردوش، حاولت أوصل لأخوه مدير أعماله ولكل المساعدين ولكل الناس وبعتلهم الرسالة اللي هو بعتها ليا ومردوش، الرسالة بس لما جاتلي في الميموري بتاعت الفيسبوك قولت أنزلها تاني لأن السوشيال ميديا هي اللي بتوصل.

وأوضح كريم الحسيني، أنه مُصِر على مقابلة الفنان تامر حسني، لأنه يمتلك العديد من الأفكار، إذ إنه مؤلف فيلم فص ملح وداب، للفنان عمرو عبد الجليل، بالإضافة إلى فيلم الحب بتفاصيله، بطولة المطرب محمد نور.

وأضاف الحسيني: تامر كان بيعمل حفلة في جامعة مصر، اللي أنا أصلًا دكتور فيها، وبدرس هناك مادة تمثيل إذاعي وتقديم برامج تلفزيونية إذاعية، وفضلت مستني لغاية بالليل ومعرفتش أدخل، اتكسفت حد يقولي أيوة يا كابتن والناس بتقولي يا دكتور، اتكسفت طبعًا، أنا عمومًا جريء جدًا، ولكن بخجل لو حد جه ناحيتي في الموضوع ده.

واختتم كريم الحسيني، حديثه قائلًا: أنا عارف إني هقابله، وعارف إني في أفكار هقولها له على مستوى الدراما، ومستوى السينما والمسرح، ممكن نتلاقى فيها، وعارف إن القاعدة دي إحنا الاتنين هنستفيد منها، لكن أنا مش زعلان منه ومش زعلان من مساعديه، وأنا عارف إنهم مشغولين، أنا عايز أتعاون معاه لأن كل الأفكار اللي عندي لايقة عليه جدًا