ياسمين عز تعتذر علي الهواء ”سوء تعبير.. والتوفيق خاني”

قدمت المذيعة ياسمين عز اليوم، اعتذارا على الهواء بشأن ما أُثير حولها أمس أثناء حديثها عن واقعة ضرب عروس الإسماعيلية،خلال برنامج "كلام الناس"، المُذاع على فضائية "إم بي سي مصر" قائلة: "أنا بعتذر بشكل واضح وصريح.. إذا كان اللي قولته امبارح اتفهم بأني موافقة على أي عنف أو أي إهانة ضد عروسة الإسماعيلية، أو إني بشجعها على قرارها".

وأضافت "مش هقول إنه سوء فهم، ولكني بعترف إنه سوء تعبير.. وإن التوفيق خاني في اختيار كلمات توضح المعنى اللي أنا كنت أقصده".

وتابعت ايضاً: "اللي كنت أقصدة امبارح إن طالما اللي الاتنين اتصالحوا، يبقى هما صحاب القرار .. حتى لو ده مرفوض عندنا في المجتمع، فالعريس وعروسته ليهم رأي تاني".

وأكملت قائلة: "محاولة العلاج بين أي اتنين ليها أكتر من طريقة، وأصعبها هي الصلح .. والأهم من الصلح إنها تكون بشروط تحافظ على كرامة الاتنين سواء الست أو الراجل".

وكانت المذيعة الشابة ياسمين عز، علقت على فيديو عروس الإسماعيلية الذي أثار حالة من الجدل الواسع بعد أن ضربها زوجها، قائلة إن الرجل بطبعه حمش وعلى المرأة أن تحتويه.

وأضافت ياسمين عز إلى أن: "راجلك دا هدية من ربنا ليكي على الأرض ونعمة من ربنا عليكي.. حبيه بعنيكي وحافظي عليه".

وعن عروس الإسماعيلية، أكدت "عز"، خلال برنامج "كلام الناس" المذاع عبر فضائية "إم بي سي مصر": "دي عروسة بنت ناس وأصيلة وبنت عيلة.. لمت دنيتها ودارت على شمعتها واحتوت الموقف وزوجها.. وليس من المعقول أن تدمر فرحها وحب 13 عاما من أجل موقف احنا مش عارفين تفاصيله".

وتابعت: "مش كل اللي تشوفه أو تسمعه تبص عليه فى كاميرا فى شارع أو فى بيت تصدقه.. وبالتأكيد العريس له رصيد كبير عن عروسته يخليها تغفرله والمسامح كريم وسعادة المرأة فى وجود الرجل فى حياتها واللي تقولك من أول ضربة أو لمسة طلقيه دي مش بتحبك.. ولما تطلقي صاحبتك دي مش هتجيبلك عريس هتقعدى فى البيت".