تفاصيل إصابت أبن ماما سناء بفيروس كورونا (بالفيديو)

ظهر محمد أحمد شاكر، ابن اليوتيوبر الشهيرة "ماما سناء"، فى فيديو جديد عبر صفحة والدته على "فيس بوك"، أكد خلاله أن شقيقه شادى أحمد شاكر، لم يصب بفيروس كورونا كما أشيع، كماأوضح حقيقة تصوير الفيديوهات التى ظهرت فيها والدته قبل وفاتها، والتى قيل عنها أنها سجلت أثناء فترة الحجر الصحى والعزل فى المنزل، والتى تعرض لهجوم شديد بسببها، ليرد على من يوجه له اتهامات التقصير فى حق والدته.

وقال شاكر، "كنت رايح أنا وشادى دمنهور فى المعهد عنده علشان يطلع شهادة قيد عائلى من الكلية، وجالى تليفون من النيابة العامة من كفر الدوار، إنى لازم أحضر أنا واخويا شادى ومراتى، علشان عاوزين أقوالنا فى قضية الدكاترة، فروحنا ووقفوا معانا ووكيل النيابة مشكورا عمل معانا فوق اللازم، واخد أقوالنا وحكينا بالتفصيل ومضينا على أقوالنا".

وتابع شادى الشقيق الأصغر لمحمد شاكر، نجلا "ماما سناء"،: "نتمنى أن اللى حصل ده مايحصلش مع حد تانى، واحنا قاعدين وصل وكيل وزارة الصحة، وبلغنا إن المسحة اللى عملوهالى طلعت إيجابى، وحمو وياسمين سلبى، وأن أنا عندي الفيروس، وفرولى عربية اسعاف على اساس أن أنا عندي المرض وهتحجز، وأنا عامل تحليلين قبل كده، والتحاليل مافيهاش أى حاجة.. فقولت الحمد لله على قضاء الله، وركبت عربية الإسعاف ورحت المستشفى.. انا ماعنديش أعراض ومش حاسس بحاجة حتى لما دخلت المستشفى ماكنوش مصدقين أنى عيان.. ووقفوا معايا كويس.. ومدير المستشفى كلمنى ووفرلى غرفة كويسة".

وأضاف شادى، "انا ماعنديش حاجة ونفوا الخبر .. انا أول مادخلت المستشفى الخبر نزل ع النت.. وأول ما طلعت نزلوا تكذيب وأن شادى مافيهوش حاجة.. فأنا بقول أن احنا كويسين ومافيش أى حاجة وعملت اشاعة مقطعية على صدرى وطلع مافيش أى حاجة... وماما سناء مامتش بالفيروس .. ماتت بضيق تنفس فى الصدر.. واحنا راضيين بأى حاجة ربنا كاتبهالنا .. وده اخر فيديو هنتكلم فيديو بنتكلم فيه عن حق ماما سناء .. والنيابة هتجيب حقنا".

فيما، قال محمد شاكر، "احنا كنا بنعمل كل حاجة علشانكوا .. وانتوا وقفتوا قصادنا.. وناس كتير دخلت تهاجمنى علشان فى اعلان على فيديو.. انا يا جماعة فى واحد ماسكلى شغل السوشيال ميديا كله.. انا بنزل الفيديو وبسيبه .. هو اللى مسئول عن كل حاجة .. ناس بتقولى انت بتودى أمك للجيم .. الجيم ده قبل الحجر الصحى والكورونا وقبل كل ده .. والفيديو قديم من 4 شهور ماكنش فى كورونا".

واختتم شادى، "مش هنفتح القصة ديه تانى .. مش خوفا من حد .. بس لأن ماما فى مكان أحسن .. ومش عاوزين حد يتكلم عليها كلمة مالهاش لازمة .. وحسبى الله ونعم الوكيل على كل ظالم .. احنا راضيين بكل اللى معانا".

ويشار إلى أن مصادر طبية بالبحيرة، كانت أكدت إصابة شادى أحمد شاكر الابن الأصغر لليوتيوبر الشهيرة "ماما سناء" بفيروس كورونا، وأضافت المصادر، أنه تم نقل شادى شاكر الذى يبلغ من العمر 22 عاما إلى مستشفى كفر الدوار العام الذى تم تخصيصه لعلاج المصابين بفيروس كورونا.

وأوضحت المصادر، أن نجل "ماما سناء"، تقدم إلى إدارة المستشفى بطلب لعلاجه وفقا لبرنامج العزل المنزلى، بعد توقيع إقرار منه بذلك، مع الالتزام باتخاذ الإجراءات الوقائية اللازمة فى هذا الشأن.