تعرف على طريقة عمل الطحينة فى البيت بطريقة صحيحة

المقادير

▪️٣ كوب سمسم أبيض (يفضل البلدى)
▪️نص كوب فول سوداني من غير قشر (اختيارى)
▪️كوب زيت نباتي عادى (نوع جيد)

ملاحظات هامة

١- اختيار نوع السمسم ونوع الزيت هما أساس طعم الطحينه.

٢- واحنا بنشترى السمسم ندوقوا ، مانختارش السمسم المر ولا اللى فيه شوائب أو رمل ، ونختار اللى لونه فاتح.

٣- الزيت لازم يكون زيت نقى وريحته حلوه عشان بيفرق كتير فى الطعم.

طريقة التحضير

اول خطوة هنغسل السمسم كويس .. هننقعه فى الميه فى وعاء عميق ونقلبه كويس ونسيبوا خمس دقايق وبعدين نصفيه كويس بالمصفاة السلك الديقة ونحطوا فى المصفاة العادية ١٠ دقايق .
ملحوظة .. لو السمسم جاهز ونضيف (مش محتاجين نغسله) وكده بتكون كمان نتيجته افضل.

هنسخن طاسه أو صينيه على نار متوسطة وهننزل فيها بالسمسم ونهدى النار خالص ونستمر فى التقليب باستمرار
إحنا عاوزين نخرج منه الرطوبة وينشف ويبتدى الزيت بتاعه يخرج.

نخلى بالنا النار تكون هاديه عشان ما يتحمصش ، واول ما يجف تماماً و ياخد لون دهبى فاتح جدا مائل للبياض ويبتدى يلمع نتيجة نزول الزيت نطفى عليه على طول.

هاروح للفود بروسيسور بتاعى أو المطحنة واطحن الفول السوداني كويس جدا

بعدها ابتدى اضيف السمسم شوية بشوية واضيف معاه نص كوب الزيت واطحن كويس جدا لغاية مايبقى شبه العجينة تقريبا

هاخد العجينة دى على الخلاط الكهربائي واضيف عليها باقى كمية الزيت واتابعها لو احتاجت شوية تانى بضيف سرسوب من فتحة الخلاط شوية بشوية لغاية ما أوصل للقوام الناعم المظبوط.

فى ناس بتحب تضيف دقيق عشان تزود الكمية وتربط القوام .. لو حابين تعملوا كده هتبقى المقادير معلقة كبيرة دقيق على شفشق الخلاط ، ويفضل ناخود الدقيق تقليبه على النار يتشوح خفيف عشان طعمه يبقى أفضل

هانضيف فى الآخر نص معلقه صغيره ملح ودى للحفظ ونخلطها كويس .. وخلاص كده الطحينة بقت جاهزة معانا

ملحوظة ..

القوام النهائي بعد الخلط بيكون خفيف شوية نتيجة ارتفاع حرارة الخليط أثناء عملية الخفق ، وكل ما هتبرد ويعدى عليها الوقت هتبقى اتقل ومظبوطه

الحفظ

تحفظ فى برطمان زجاجي جاف ومعقم ومحكم الغلق خارج التلاجة ، بتعيش لغاية ٣ شهور بشرط ناخود منها بمعلقة جافة ونظيفة.