محمد سليمان يرد علي كوميكس «ده_ هاني» المشهد اتفهم غلط وهاني زي الفل

تداول رواد موقع التواصل الاجتماعي مشهدًا قديمًا من مسلسل «هذا المساء» للفنان إياد نصار وأروى جودة ومحمد سليمان، يدور حول زوج فوجئ بزوجته وشخص آخر كانا في غرفة نوم بمفردهما، فيعنّف الزوج زوجته، بينما تندهش الزوجة من رد فعله لترد عليه باستعجاب «ده هاني»، وهو ما استقبله رواد موقع التواصل الاجتماعي بسخرية حتى وصل الأمر إلى أن يصبح تريند «#ده_هانى».

الفنان محمد سليمان الذي كان يجسد شخصية هاني في المسلسل علق قائلا: «أنا مستغرب لأن المسلسل معروض بقاله كتير، مش أول مرة يتعرض ولا أول مرة يتشاف بس بصراحة أنا ضحكت لما شوفت الكوميك».

وأضاف في تصريحاته لـ«مصروناسها»: «أنا اتسألت كتير جدًا على أن ده طبيعي إن الزوجة يكون ليها صديق وتعليقي على الأمر ده إن كل مجتمع له ثقافته، وكل شريحة من المجتمع المصري ليها طريقتها، والجمهور كمشاهد بيشوف أفلام من بلاد العالم كلها وثقافات كتيرة جدًا مطروحة أمامنا من خلال الدراما والأفلام المفروض نتفرج على كل حاجة ونحلل ونفكر ونشوف الانسب لينا ولعادتنا وتقاليدنا ومجتمعنا مش معقول نتفرج على المسلسل ونقلده تقليد أعمى».

وتابع: «الناس مش فاهمين إيه مضمون الحكاية واللي شاف المسلسل هيفهم إن مفيش أي حاجة بينها وبين هاني، وإن الشخصية اللي قام بيها إياد نصار كان عندها شكوك في كل اللي حواليها لأنه من جواه مش كويس».

واختتم حديثه: «لازم نفكر ونحلل ونختار الأنسب لمجتمعنا، إحنا بنعرض حالة، وفيه وعي ونقدر نفرق الصح من الغلط، أو هينتهي الأمر بينا لكارثة».