لأول مرة قصة صاحبة أغنية عمرو دياب «ياريت سنك» تفاصيل

روي الشاعر بهاء الدين محمد قصة عن كواليس كتابة أغنية «ياريت سنة» التي غناها النجم عمرو دياب منذ أكثر من ٩ سنوات.

وقال «محمد»: «كنت عند مطرب وكان ناجحلنا أغنية نجاح غير عادى وكنا بنتفق على أغنية جديدة وبعد شوية دخلت علينا بنت قريبته صغيرة بالنسبالى بس شكلها وكلامها وإحساسها أكبر من سنها وكانت جميلة جدا بأنوثة ناضجة ولونها حلو وعندها قبول غير عادى وكأنها نجمة مشهورة، وهى فرحانة بجمالها وكل شويه رايحه جايه تتفرج على نفسها ف المراية بشكل لطيف وطيب، وأنا بأتفرج عليها وعلى جمالها بنية سليمة طبعا».

أضاف في منشور عبر حسابه على «فيسبوك»: «كانت معجبة بيا كشاعر وصديق وعندها وعى ومثقفة جاتلى فكرة الأغنية وحطيت إسمها ف الأغنية ناقص حرف علشان أدلعها وحقها بصراحه وهى عرفت وسمعت كلام الأغنية قبل ما عمرو دياب يغنيها».

وتابع: «الأهم بقى إن المشهد تكرر بعد كام سنة كنت رايح للمطرب وأول مادخلت قالى إنها موجودة مع جوزها في السفرة ودخلت أسلم عليهم فوجئت بإنها خرجت من باب خلفى هي وجوزها إندهشت وقالى المطرب وهو بيضحك إتكسفت ورفضت تشوفها بعد مابقت أم وعايزاك تفضل فاكر الصورة اللى شوفتها فيها وهى صغيرة وطبعا كان بيضحك لأنه فاهم إن الحكاية حكاية بنوته حلوة بريئة وشقاوة جمالها مع شاعر وصفها في أغنية فقط وفى جملة في الأغنية غيرتها بس حطيت الأصل تحت بين الكلمات».

وأختتم حديثه قائلا: «أنا بقى كتبت يومها اللى حصل وإن السنين عدت وإتكسفت وخافت أشوفها ماما».