صاحبة الفستان الأزرق تتصدر تويتر مجددا بعد مفاجأة عدم زواجها وموقفها من فيديو الرقص

صاحبة الفستان الأزرق، تصدرت خلال الساعات الماضية "ياسمين" الشهيرة بصاحبة الفستان الأزرق، موقع التغريدات الشهير "تويتر"، كما تواجدت ضمن قائمة الأكثر تداولًا وتعليقًا وذلك عقب تصريحاتها الأخيرة التي تحدثت خلالها عن أزمة ظهورها في مقطع فيديو وهي ترقص.

صاحبة الفستان الأزرق

وقام رواد ونشطاء موقع تويتر بنشر ومشاركة تصريحاتها خلال مداخلتها ببرنامج 90 دقيقة والمذاع عبر قناة المحور، وسط العديد من التعليقات المختلفة بين الجمهور الذين تفاجأوا بتلك التصريحات خاصة بعد قولها إنها طالبة وليست متزوجة بخلاف الأخبار التي تم تداولها مؤخرًا عن طلاقها بسبب فيديو الرقص.

في حين قام آخرون بمشاركة الفيديو الذي تسبب في أزمة لها، مصحوبًا ببعض التعليقات المتباينة.

تصريحات ياسمين صاحبة الفستان الأزرق

وكانت ياسمين صاحبة الفستان الأزرق، بكت على الهواء، قائلة: "أنا مش مسامحة أي حد بيتكلم في حقي كلام مش كويس، وحسبي الله ونعم الوكيل في اللي نزلوا الفيديو والناس اللي استعملته استعمالات غلط واتكلموا في حقي بالباطل وطلعوا عليَّ شائعات".

وأضافت خلال مداخلة هاتفية ببرنامج "90 دقيقة" المذاع على قناة "المحور": "أنا بقيت مكسوفة أمشي في الشارع ومكتئبة من كتر الكلام والكومنتات السخيفة اللي بتيجي من ناس الله أعلم بيهم هما فعلًا بيعملوا إيه في حياتهم".

وتابعت: "أنا بجد مش مسامحة أي حد بيتكلم في عرضي ولا أي حد أساء ليَّ ولأهلي وشكك في تربيتي، وحسبي الله ونعم الوكيل في كل الناس اللى شهَّرت بيَّ، أنا ما عملتش حاجة غلط أنا في فرح صاحبتي وقريبتي ما بعملش غلط الدنيا كلها بتفرح وبترقص، ما عملتش حاجة غلط و90% من اللي كانوا موجودين كانوا ستات وقالوا رايحة تجيب عريس ومش عارفة إيه وكلام زبالة ويوجع وما حدش متخيل الوجع اللي استحملته واللي والدتي استحملته".

وأكملت: "أنا فرحانة بصاحبتي وبجد ليه ماسكين فيَّ وسايبين الناس اللي بتسيء على التيك توك والإنستجرام وفيس بوك واللي بيعملوا فيديوهات خليعة، إزاي جايين تهاجموا حد في فرح، والدة العروسة ووالدتي قرايب".

ولفتت: "ما زال البحث جاريًا عن مصور الفيديو واللي قام بنشره وقدمنا بلاغ لمكتب النائب العام، ورميت تكالي على المحامي بتاعي، لسه ما اتعرفناش على اللي عمل الفيديو".

وأكدت: "أنا غير متزوجة ولسه طالبة جامعية وما اتخرجتش وطلعوني إني متزوجة واتطلقت، أنا بدرس في كلية الآداب قسم الآثار بجامعة المنصورة، ونزلت الجامعة وامتحنت بس تعرضت لحاجات كتيرة مسيئة جوة الجامعة ودا كان بيخليني أكتر من مرة مش عايزة أكمل امتحاناتي بسبب التنمر".

وتابعت: "والدتي مصدومة بسبب الكلام اللي اتقال عليَّ وأنا ممتنة ليها لوقفتها في ضهري وعمرها ما قصرت وهي بتحاول تخرجني من الأزمة النفسية اللي أنا فيه".