تامر حبيب عن حضوره حفل زفاف يوم جنازة سمير غانم: لو كان مكاني هيعمل كده.. وعايز صحابي يوم وفاتي يعملوا حفلة

علق السيناريست تامر حبيب على الانتقادات التي لاحقته بعد حضوره حفل زفاف في الجونة، يوم جنازة الفنان سمير غانم، وعدم حضوره الجنازة على الرغم من عملهما معًا.

وقال تامر حبيب في تصريحات تليفزيونية: أستاذ سمير غانم الله يرحمه لو مكاني ممكن هو يعمل كده لأنه كان راجل بيموت في البهجة، وأنا يوم جنازته كنت في الجونة وعندي الفرح وكنت عايز أرجع القاهرة أحضر الجنازة وأرجع تاني على الفرح بالليل.

وتابع: أنا مؤمن بـ ده وكتبت وقتها لما لاموا علينا لما روحنا الفرح بالليل في نفس يوم جنازة أستاذ سمير غانم، وبكرر كلامي تاني وأنا مسؤول عنه، لما أموت عايز كل اللي بيحبوني يعملوا حفلة كبيرة على سيرتي ويشغلوا الأغاني اللي بحبها ويفتكروا المواقف الحلوة ويرقصوا ويتبسطوا، وساعتها هكون أكتر واحد مبسوط في الكون، ودي تعاملي مع الموضوع.

وأضاف تامر حبيب: دا مالوش علاقة بـ دا، وتلك نقرة وتلك نقرة، ولكل مقام مقال، مش معنى إني روحت الفرح إني مزعلتش على أستاذ سمير، الراجل ده كان حبيبي وصاحبي ونولت الشرف إني اشتغلت معاه في مسلسل شربات لوز، وأنا عارف أنه مش متضايق، ولا أولاده زعلانين.

سمير غانم وتامر حبيب
وسبق أن تعاون الراحل سمير غانم مع السيناريست تامر حبيب، في مسلسل شربات لوز الذي عرض في موسم رمضان 2021، وضم العمل عدد كبير من الفنانين أبرزهم: يسرا، الراحل سمير غانم، صبا مبارك، رجاء الجدواي، محمد فراج، إنجي المقدم، وعددا آخر من الفنانين، والمسلسل من تأليف تامر حبيب وإخراج خالد مرعي.