شاهد هكذا دعم رامي جمال النقاش الشاب أحمد سالم

نشر المطرب رامي جمال فيديو عبر حسابه على إنستجرام، يتحدث فيه عن سبب دعمه للشاب النقاش أحمد سالم.

وقال جمال في الفيديو: "أولا إزيكوا، ثانيا عايز أتكلم عن حاجة مهمة جدا، أنا شايف القبول اللي ربنا كاتبه للفنان أحمد سالم، أحمد فنان بدرجة ما شوفتهاش في حياتي بصراحة مرتين تلاتة، أنا شايف القبول اللي ربنا كتبه والحب اللي أنتوا حابينه ليه، دي حاجة ما بتحصلش كل يوم".

وتابع: "فرحان جدا جدا إن ما زال الصوت الحلو والفن الحقيقي الناس بتحبه وبتدعمه، فيه ناس كتير فرحانة وبتقولي شكرا إنك بتساعد أحمد، أنا مش بساعد أحمد، أنا بساعد نفسي كفنان وكملحن ومطرب برضو إن الوسط الفني لما يبقى فيه فنانين زي أحمد كدا وأصوات زيه، دي حاجة بترقى بالذوق العام، وحاجة بقينا محتاجينها كلنا".

وأضاف: "ثانيا أنا اتربيت في بيت أهلي إن الفرصة لما بتيجي لحد بتبان إن ربنا باعتها، وإحنا كلنا أسباب لبعض، ممكن أنا أحاول أسهل مشواره في الفن، ودي حاجة بالنسبة لي قمة في السعادة، أنا وقت ما شوفت الفيديو بتاع أحمد كان لسه ما انتشرش بالشكل دا؛ لأن فيه ناس بتقولي أنت بتساعد بس عشان التريند، والله عمرها ما كانت شخصيتي ولا هتبقى شخصيتي؛ لأن مفيش حد ضامن أنه يعمل حاجة ونيته مش صافية إنها في الآخر هتوصله للنتيجة اللي هو عاوزها".

واستكمل: "بس أنا عاوز أقولهم حاجة؛ لأن اللي باعتيلي كدا أكيد موهوبين بردو وأكيد مستنين الفرصة وأكيد مضايقين وشايفين إن الفرصة اللي ربنا إداها لأحمد والقبول اللي إداه لأحمد هما يستحقوه، بس والله بطمنهم، جايكلوا كلكوا الفرصة، الزرق من ربنا بميعاد، ولو ربنا سخرني لأحمد وسخر الجمهور له في إنه يبقى حاببه ويساعده دلوقتي، فرصكوا كلها جاية حاولوا".

وأشار: "اللي أحمد عمله في الآخر ڤيديو عادي جدا، وهو بيشتغل و زي الراجل وسيد الرجالة، لا راح وقف قدام إستديوهات ولا راح عمل حاجة، بس هو راجل نقي نيته سليمة، ففي الآخر الڤيديو بعد سنة ونص جه ميعاد إن ربنا يكتب له القبول فيه وإنه ينتشر جدا جدا".

وأردف: "عاوز أقول لكل الناس اللي ما أخدتش الفرصة، ربنا يديكوا أكتر من اللي اتمنتوه، وإن شاء الله زي ما ربنا وقفني لأحمد ووقف ناس ليا زمان، هيوقفلكوا ناس، جاي لرزقكوا ميعاد، وإن شاء الله لو ربنا كرمنا في مشروع أحمد، دي حاجة هتشجعني أنا كرامي وهتشجع غيري من الفنانين، وعايز أشكر كل الفنانين اللي كلموني، وكل شركات الإنتاج اللي كلمتني عشان عاوزة تبقى موجودة في مشروع أحمد، والله العظيم أنا لو سعيد بحاجة؛ سعيد إني شايف إن فيه ناس بتحب الفن الحقيقي، لو طلع لنا 10 أو 15 صوت زي أحمد، إحنا المستفيدين كلنا في الآخر".

واختتم الفيديو: "بقول لكل الناس شكرا لكل اللي عملتوه مع أحمد، أنا معملتش حاجة خالص لسه، وحتى بعد ما أعمل، أنا مش بعمل لأحمد، أنا بعمل لنفسي عند ربنا في فكرة إن مفيش حد هياخد زرقي، فاللي بيسهل لحد حاجة هيلاقي مليون واحد يسهله حاجات تانية، ربنا يكتبله الخير، وإن شاء الله الفترة اللي جاية يبقى فيه مفاجآت كتير، وبوجه لأحمد رسالة عن طريقكوا هنا كفاية برامج لو سمحت لحد ما تخلص الأغاني، يومكوا جميل".

وكان العديد من رواد منصات التواصل الاجتماعي قد تداولوا على مدى الساعات الماضية مقطع ڤيديو لشاب يعمل بمهنة النقاشة، وهو يؤدي أغنية للفنانة الكبيرة وردة الجزائرية بطريقة لاقت إعجاب الكثيرين.

وبالبحث، تبيّن أن الشاب يدعى أحمد سالم، ويمتلك قناة على يوتيوب ينشر من خلالها مقاطع قصيرة للأغنيات التي يؤديها بينما يمارس عمله بالنقاشة، وتوجهت "الشروق" لمنزل الشاب بزفتى بمحافظة الغربية، ليكون ظهوره هو الأول بعد الضجة الكبيرة التي أحدثها بڤيديو أغنيته.

وأجرت معه "الشروق" حوارا بالفيديو، جاء من بينه، حديثه عن بداية تعلقه بالغناء وموقف أسرته من خطوة احتراف الفن.