لا هي مجد ولا قيمة مادية ... عمرو أديب يوجه رسالة لـ فريد الديب

وجه الإعلامي عمرو أديب، رسالة إلى المحامي فريد الديب بعد اعتزامه الترافع عن المحكوم عليه بالإعدام محمد عادل قاتل طالبة جامعة المنصورة نيرة أشرف.

وقال خلال برنامجه "الحكاية" عبر شاشة "mbc مصر"، مساء الأحد: "فريد الديب من الأسماء المهمة وهو أحد أهم 5 محامين في مصر.. أنا مش فاهم سبب هذا الحماس اللي ساعات بنشوفه مؤكد وساعات يتم نفيه .. سواء كان عاوز أو مش عاوز.. عاوز أسأله ليه عاوز تدي ثقل لهذا المتهم .. إيه هي الظروف اللي مخلياك متعاطف مع المتهم".

وأضاف: "أنا لا أنفي حق المتهم في وجود محامي أو عشرة أو عشرين معه.. لكن هل إنت لسه بتدور على مجد.. إنت ليك مجدك ولك ما لك وعليك ما عليك .. فريد الديب تدخل في قضايا خلافية كثيرة منها إنه دافع عن جاسوس إسرائيلي".

وتابع: "ليه يا أستاذ فريد.. لا هي مجد ولا قيمة مادية .. أنت لا تحتاج إلى قيمة مادية .. الخطوة دي سببت أذى لإحساسي .. أناشدك عدم المشاركة في القضية".

وأكمل: "لو في النقض صدر حكم إعدام (ضد محمد عادل) يبقى فريد الديب معلمش حاجة .. يبقى زيه زيي.. هل أنت عاوز تمارس رياضة فكرية ، طاب ما تكتبها في كتاب".

واستطرد: "فريد الديب رافض ينفي أو يؤكد هياخد القضية ولا لأ.. هو قال أنا بصيت في الحيثيات .. إنت مش محتاج شهرة ..مصر فيها آلاف المحامين وفيه منهم العشرات يحبوا القضية دي لكن ليه فريد الديب عاوز يهز قناعة داخل المجتمع".