”أنا مندفعة وأكرر أخطائي في الحب”شاهد بالفيديو أجرا تصريحات لدينا الشربيني

في أول رد رسمي على أنباء خطفها النجم عمرو دياب من زوجته زينة عاشور، أكدت دينا الشربيني أن العلاقة بين الثنائي كانت "منتهية" منذ فترة طويلة، واعترفت الشربيني بأنها مندفعة في تجاربها العاطفية وتتكرر أخطاءها في الحب، واستبعدت دخولها في ارتباط جديد خلال الفترة الحالية.

وقالت دينا خلال استضافتها ببرنامج AB TALKS الذي يقدمه الإعلامي أنس بوخش: أنا مندفعة وبمشي ورا إحساسي وأكيد عايزة أغير حاجات فيا وكلنا عايزين نبقى أحسن بس حاسة إن لو فيه حاجات فيا اتغيرت هبقى أوحش مما أنا عليه دلوقتي.

https://youtu.be/0YJdaGwpUHA

وتابعت دينا الشربيني: أؤمن بالحب من أول نظرة وحبيبة أوي، وأنا عارفه إني من جوا شخص ضعيف لما بقعد مع نفسي قلبي خفيف أوي وبتأثر بسرعة وبحب بسرعة.. وعشان بكره الضعف فباجي على نفسي، والحمد لله أنا أحسن من ناس كتير وكل حاجة بحبها حوليا فلازم أستحق ده عشان ميروحش مني.

وأضافت دينا: حبيت مرتين في حياتي وللأسف بكرر غلطاتي في علاقاتي.. ومعنى الحب بالنسبة لي هو الأمان والثقة والحنان وبكره الكذب والخيانة في العلاقة، ومفهوم الحب ككل حلو ولكن لما بيبقى الإنسان في علاقة ويحب بجد بيتوجع فده مش بحبه في الحب.

الإعلامي الإماراتي أنس بوخش، توقف أمام تعرض دينا للخيانة من أقرب صديقة لها والتي خطفت حبيبها وقال: لاحظت بكثرة أن النساء يسرقن أزواج وأحباب صديقاتهن، وعندما أسمع القصص؛ أجد 90% نساء وليسوا رجالاً.. لماذا تسرق النساء الأزواج؟ ويمكن أن تكون أعز صديقة لكِ؟.

وَرَدَّت دينا الشربيني، قائلة: أخطر حاجة في الموضوع، إنها بتكون عارفة كل حاجة عنه، وبالتالي بيكون سهل بالنسبالها.. أنا مش عارفة ليه الرجالة مش كده زي الستات، ودي حاجة مُهينة بالنسبة لينا، لكن مفيش واحدة بتسرق راجل، كله بييجي بمزاجه.

وأضافت دينا الشربيني: ما اتعقَّدتش، ولسه بثق في الناس عادي، أصل مش كل الناس شبه بعض، ومش معقول هيفضل يحصلك نفس الحاجة كذا مرة تاني، وآه المفروض الواحد يتعلم، بس أنا بشوف إن أنا لو ركزت أوي في الحتة دي، مش هيبقى عندي أصحاب بنات بقى، أنا بثق في صحابي، واللي هتخذلني تاني، خلاص، هتطلع من حياتي وخلصنا، صاحبتي ممكن أتضايق عليها أكتر من أي شخص، لأن الصداقة أكتر من الأخوات.

وانتقل بها أنس للوجه الأخر من العملة، ملمحاً لاتهام دينا بخطف عمرو دياب من زوجته زينة عاشور وأسرته، وحرصت الشربيني على عدم ذكر أسماء، ولكنها قالت صراحة إن العلاقة بين الزوجين انتهت تماماً قبل فترة طويلة من تعرفها عليه، وقالت: في فترة طويلة أوي مثلًا سنتين في حياتي، مش عايزة أحكي القصة ولكن هقول الكلام اللي بيتقال، كان الناس بتقول إني أخدت حد من حد.. ده مكنش حقيقي خالص، والوقت ده صحابي قالوا لي قولي إن الموضوع ده كان خلص من سنين طويلة وإن مفيش حاجة، ولكني قررت متكلمش.

وعن سبب امتناعها عن الرد لمدة عامين، أوضحت دينا الشربيني قائلة: مش حياتي لوحدي ومكنتش هقدر أطلع اتكلم عن حياة أشخاص، إحنا كنا مع بعض ومش على رأسي بطحة لأرد على تلك الشائعات، مع إني عارفة إن في ناس كتير كرهوني بسبب الموضوع ده اللي هو مش حقيقي.

وأضافت دينا الشربيني: أنا في حياتي عموماً بسيب اللي يتكلم يتكلم، وناس كتير بتقولي ده غلط، وإني محتاجة أطلع أتكلم، أنا مش عايزة أعمل كده، ولا أركز مع الحاجات القديمة، أنا عايزة أركز في شغلي وأهلي والناس اللي بحبهم، هما دول اللي فارقين ليا وهما دول اللي عارفين دينا تعمل إيه ومتعملش إيه.

وحول احتمال دخولها علاقة عاطفية جديدة قريبا قالت: عندي لخبطة في حياتي الشخصية، مش عارفة أقعد مع أهلي ولا أشوف صحابي، ولا عندي حياة شخصية ولا حياة مع شخص ارتبط بيه؛ لأنه صعب ومش أي حد يقدر يستحمل إنك على طول مش موجود.

وتحدثت دينا عن طفولتها قائلةً: طفولتي كانت حلوة أوي لحد الجامعة، وأنا كنت طفلة شقية وعندية جداً وزنانة وبقول يارب عيالي ميطعلوش زنانين وأهلي كانوا كويسين أوي واصحابي بالنسبة لي حاجة مهمة أوي، وبابا كان زمان بيسافر كتير.

وأشارت دينا الشربيني إلى أن أصعب لحظة في حياتها كانت وقت إعلان وفاة صديقها الفنان الراحل هيثم أحمد زكي، وتابعت قائلة: أصعب لحظة في حياتي لما واحد صاحبي أوي توفي، توفي في البيت جاله هبوط، ده هيثم زكي الله يرحمه، كنت أعرفه من زمان، بكره فكرة الموت، مش عايزاها أصلًا تيجي في دماغي، ولكن الموت بيجي في ثانية.

أضافت دينا الشربيني: هيثم كنا كلنا بنحبه جداً بس يمكن هو مكنش عارف إحنا قد إيه بنحبه، فساعات ببقى عايز بس الوقت يرجع اقوله أنا بحبك، وبعدين أمشي لو عايز.

وأضافت دينا الشربيني: المتوفى ممكن يكون في حتة أحسن ومرتاح بس بيوجع اللي حواليه هما اللي عايشين ده، بس هما أكيد مرتاحين، دايماً بقول لأي حد أعرفه فقد حد عزيز منه، حطوا في دماغكم إن الشخص ده سافر.

كما أشارت دينا الشربيني، إلى أن الشعور بالموت والوحدة هما أكثر شيء تخاف منه قائلة: بخاف من الوحدة والموت، الوحدة أكتر إحساس بيخوفني ومش بحبه، مش عايزة لما أكبر أعيش لوحدي، أكيد هيبقى نفسي في حد ياخد باله مني، لما بشوف حد كبير في السن لوحده مبتمناش أبقى كده، ومفيش حد يتمنى يكون كده.