«طردوني وبعتولي اللي يقتلني»تفاصيل صادمة لخلافات أبناء شعبان عبدالرحيم على الميراث

كشف عدوية ابن الفنان الشعبي الراحل شعبان عبدالرحيم، عن وجود خلافات على الميراث بين أبناء الفنان الشعبي الكبير الراحل.

وقال عدوية، في فيديو نشره عبر حسابه على "تيك توك": "عايز أقول لكل الناس، الأخ اللي يمشي أخوه من البيت عشان خاطر الفلوس يبقى أصلا مش جدع، وأنا خلاص عملته بلوك من قلبي مش من التليفون بس، وأنا أخوك الصغير ومش راضي عن اللي حصل، وأنا مش عاوز فلوس خلاص".

وأضاف: "أقسم بالله لو الفلوس اللي هتيجي من حاجة أبويا 10 ملايين جنيه، أنا مش عاوز منها جنيه، ولو أنتم هتبقوا مرضيين خلاص، اعملوا كده، أنا تعبان.. ومش حمل كل شوية مشاكل ومواضيع بتحصل على الفاضي، اعملوا معروف إحنا مش فاضيين وعايزين نشوف شغلنا وبلاش قلق على الفاضي".

وتابع: أنا كان معايا فلوس كتير أوي وصرفتها، بس بتاعتي، مخدتش حاجة من حد فلوس، ولو حد من أخواتي له فلوس عندي فإحنا لسه لينا حاجات نبيعها وأدفع اللي عليّا، أما إني كان معايا عربية ومبقاش معايا فأنا عشان قفلت منها، كان عليّ فلوس أي كلام لأختي، بعتت لي ناس من قرايب جوزها على الطريق اتخانقوا معايا وزنقوا عليّا عشان ياخدوا مني فلوس أو العربية أو يقتلوني".

واختتم: "أنا مسامح في حقي، لكن اللي عمل معايا أي حركة وحشة أنا خلاص شيلته من قلبي، وأنا بقول لكل الناس وأخواتي كل سنة وأنتو طيبين".

وعلّق على الفيديو قائلا: "أنا مش عايز ورث من حد، ولا عايز حاجة أبدا غير الأدب والاحترام، بجد سيبوني أعيش في هدوء من غير مشاكل، لأن أنا في بدايات طريقي وأنا عايش بعيد عنكم محدش عارف عني حاجة أبوس إيديكم، سيبوني أقف على رجلي عشان أنا عندي ٧ عيال ولادي وأنا لوحدي دلوقتي، وأبويا مش جنبي عشان يشوف أخويا وهو بيمشيني من البيت".

يذكر أن نشبت في الفترة الأخيرة أزمة بين عدوية وعصام ابني شعبان عبد الرحيم، وذلك بسبب توزيع إرث والدهما، حتى وصلت الأمور بينهما إلى طرد عدوية من منزل والده الذي كان يعيش فيه مع زوجته، وذلك بعد وفاة والدهم في 2019.