والدة الطفل رشيد: تشكر المتبرعين بحقنة طفلها «أنقذتونا في أخر لحظة»

وعدتونا ووفيتم، هكذا شكرت هدى بدر، والدة الطفل رشيد،المتبرعين بحقنة ابنها وتكلفتها 35 مليون جنية، والذي يعاني من مرض ضمور العضلات الشوكي عن جمع المبلغ المطلوب لثمن الحقنة لعلاجه، وذلك عبر صفحتها على موقع التواصل الاجتماعي «فيس بوك».

وكشفت «هدى» عبر حسابها على «فيس بوك»: «الحمدلله، تم تجميع المبلغ بالكامل، وعدتونا ووفيتم، شكرا ليكم، لما رشيد اتشخص بمرض الـSMA وعرفنا ثمن الحقنة اللي محتاجها، سلمنا أمرنا لله ودعينا ربنا يقوينا على الاختبار ده، متخيلناش أبدًا إننا هنوصل للحظة دي وإن حكمة ربنا تكون إن رشيد يخلق الحالة دي من التكافل الاجتماعي والحب والخير والأهم أن الناس تتعرف عن المرض دة ويبقى في أمل لأطفالنا إنهم يتعالجوا بفضلكم».

وتابعت والدة الطفل رشيد: «شكرًا لكل اللي دعم رشيد، لأن رشيد بسببكم هياخد الحقنة وإن شاء الله أطفال كتير من بعده، دعواتكم نبدأ رحلة العلاج الأسبوع ده وتفضلوا معانا خطوة بخطوة لحد ما نتطمن عليه».

ووجهت والدة رشيد الشكر لإحدى المؤسسات الداعمة والبنوك التي سهلت فتح الحسابات لجمع التبرعات: «أنقذتونا على أخر لحظة وخلتونا متستناش وقت أطول، حابين نستغل الفرصة دي ونوصي نفسنا أولا ونوصيكم، نبذل نفس المجهود وأكتر لليال وآسر، ثقتنا فيكم إننا نقدر في نفس الفترة، وأقل كمان، نجمع نفس المبلغ لكل واحد فيهم عشان ياخدوا الحقنة، ومن بعدها إن شاء الله باقي الأطفال مصطفى وهاندا وغيرهم».