طريقة عمل العيش بالحلبه (( البتاو الفلاحي))

المقادير :
2كوب دقيق اسمر(القمح الكامل)
1كوب دقيق ذره
1كوب دقيق ابيض
2ملعقة حلبه مطحونه (وده سر طعمه المميز)
كوب زبادي كبير او لبن رايب
نص كوب زيت او 3ملاعق سمنه بلدي
ملعقه ونص خميره فوريه كبيرة+ملعقة سكر ك+نص كوب لبن دافي مع بعض
رشة ملح

التحضير :
اول حاجه هنحط كل المقادير الجافه مع بعض وننخل الدقيق واحنا بنضيفه
بعد كده نضيف الخميرة بعد ما دوبناها بالسكر واللبن الدافي
وبعدين نضيف الزيت او السمن والزبادي ونبتدي نلم ونلت ونعجن كوييييييييييس جدا
ندهنه بزيت ونغطيه ونسيبه يخمر في مكان دافي لمدة ساعتين

بعد ساعتين ونشوفه نفش وخمر كويس نبتدي نقطعه كور متوسطه الحجم
ونسيبها تاني تستريح عشر دقايق
بعد كده نبتدي نفردها
نرش دقيق علي الرخامه ونفرد رغيف رغيف
وفي الوقت ده نكون جهزنا طاسه كبييره ومسحناها بزيت خفيف وحطناها تسخن علي النار
وبعد كده في الطاسه علي النار مباشرة
وتبتدي تعملي الي بعده وهو بيستوي
اول ما يفقفق ويعلي شويه يتقلب علي الناحيه التانيه
وما بياخدش وقت كتير في السوي
وهكذا رغيف رغيف لغاية ما تخلصي الكميه
(ملحوظه)
ممكن نزود لبن او زبادي حسب ماتحتاج العجينه وتلم معانا لان انواع الدقيق مختلفه.