كيف تعالج نفسك من الكورونا منزليا

وفق الإرشادات والنصائح الطبية التي تقدمها منظمة الصحة العالمية وتعليمات وزارة الصحة المصرية نتشرف بأن نقدم لكم بروتوكول العلاج المنزلي لو شاكك في كورونا لاقدر الله

في حالة الجائحة (pandemic) انت بتتعامل مع أي سخونية/أعراض برد/تكسير عضم/فقد حاسة الشم/اعراض اسهال ومغص/ضيق تنفس والتهاب رئوي على أنها كورونا حتى يثبت العكس

لما تشك في الأعراض تبدأ تعزل نفسك فورا. تلبس ماسك/تقعد في غرفة لوحدك/حمام لوحدك إن أمكن لو مش ممكن يبقى لازم تطهير الحمام بعد ماتستخدمه كل مرة/الاكل يتسابلك على باب الغرفة/اي فضلات أو هدوم متسخة تسيبها انت على باب الغرفة/استخدم مطهرات اليد بسخاء (كحول وخلافه)/الكمامة طول الوقت لو معاك حد في الغرفة/العزل يبقى لمدة أسبوعين من التقاط العدوى أو حتى ظهور عينة مسحتين سلبيتين لو كان متاح عمل المسحة.

بلاش اختلاط، بلاش اختلاط، بلاش اختلاط. صور الزحمة اللي الواحد بيشوفها مرعبة لو انت أعراضك خفيفة علشان مناعتك قوية ممكن تعدي حد مناعته ضعيفة. ولو حتتحرك يبقى بالكمامة والكحول أو غسيل الأيدي باستمرار.

بالنسبة للادوية:

-باراسيتامول (بنادول/ادول/بارامول/باراسيتامول/نوفالدول) يؤخذ للحرارة أو الصداع أو ايه آلام.

-ادوية الكحة الناشفة (بدون بلغم) زي بلسم/برونشيكم/نوتسيل/سيلجون/سينادراي) وبلاش الأدوية اللي فيها dextromethorphan علشان يقال انها بتزود نمو الفيروس.

-دواء المغص زي فيسرالجين عند اللزوم.

-دواء الغثيان زي موتيليم وفي الحالات الشديدة زوفران.

-دواء الاسهال زي ايموديم/هيدراسيك/كابيكت/لاكتيول فورت (بلاش فلاجيل وانتينال).

-في حالة احتقان الأنف بخاخات زي فيزيومير/سينومارين/فري نوز.

-في حالة احتقان ووجع الحلق اقراص استحلاب زي لاري برو/ستريبسيلز/بيكتول أو بخاخات الحلق زي اوريكس/سولفادول/بي بي سي.

-فيتامين سي واحد جرام يوميا طوال فترة الأعراض.

-زنك قرص يوميا طوال فترة الأعراض.

-موسعات الشعب باستخدام جهاز النيبوليزر زي محلول ملح فاركولين مع بالميكورت فقط عند ظهور ضيق في التنفس وخصوصا للمرضى اللي عندهم من الاول حساسية في الصدر أو مشاكل تنفسية. بس طبعا دي علامة طارئة توجب الانتقال للمستشفى وطبعا ممنوع استخدام الجهاز لأكثر من فرد في البيت ويستخدم فقط داخل غرفة العزل المنزلي منعا لنشر العدوى.

تقوية مناعة الجسم بالنوم الكويس والاكل المتوازن الغني بالبروتينات والخضار والفواكه والاكثار من السوائل الدافئة وحبة البركة مع العسل.

في حالة السيناريو الاسوء لاقدر الله وهو انك محتاج مستشفى ومش لاقي مكان أو مش عارف تروح أو فيه تعطيل لسبب ما ممكن تجيب جهاز اوكسيميتر لقياس الأكسجين في الدم (متاح في القصر العيني) لو لقيت تركيز الأكسجين أعلى من ٩٣٪ يبقى مفيش قلق لو اقل يبقى انت محتاج اكسجين ممكن توفره في اسطوانات منزلية. كوضع مؤقت حتى الانتقال إلى المستشفى.

اي علاج مش مكتوب هنا ياما مش حيفيد يإما هيضر يإما لازم يكتبه دكتور متخصص بعد مراجعة الحالة.

حفظكم الله آمنين وسالمين ومع فتح الدنيا المتوقع الفترة القادمة كمامتك أساسي وغسيل الايدي بالصابون باستمرار مع الكحول